शिरवळ : परिसरात सध्या एक गंभीर आणि संतापजनक वातावरण निर्माण झाले आहे. नागरिकांचा आरोप आहे की, पोलिस निरीक्षक नलावडे यांच्या “आशीर्वादाने” परिसरात अवैध धंद्यांना खुलेआम वाव मिळत आहे. मटका, अमली पदार्थांची विक्री, अवैध दारू विक्री असे गैरकृत्य खुलेआम सुरू असून पोलिसांकडून त्याकडे जाणीवपूर्वक दुर्लक्ष केले जात असल्याची चर्चा जनमानसात रंगत आहे.
या सर्व प्रकारांमुळे शिरवळमधील अनेक कुटुंबांची दिवाळी उध्वस्त झाली आहे. काहींची घरे उद्ध्वस्त झाली तर काहींच्या तरुणांची आयुष्ये अमली पदार्थांच्या आहारी जाऊन नष्ट झाली आहेत. स्थानिक नागरिकांनी संतप्त होत असा सवाल उपस्थित केला आहे की, “नलावडे साहेबांची दिवाळी गोड झाली, पण आमच्यासारख्या सर्वसामान्यांची दिवाळी कडू का?”
नागरिकांच्या मते, गुन्हेगारीला आळा घालण्यासाठी नेमलेले पोलीसच आता या गैरव्यवसायांना पाठबळ देत आहेत. विशेष म्हणजे, तक्रार करणाऱ्यांनाच गुन्हेगारासारखी वागणूक दिली जात असल्याचे आरोप आहेत. काही नागरिकांनी सांगितले की, पोलिस स्टेशनमध्ये खरे गुन्हेगार येऊन ‘फोटो सेशन’ आणि ‘रिल्स’ करताना दिसतात, तर प्रामाणिक नागरिकांना धमक्या आणि त्रास दिला जातो.
काही स्थानिकांचे आरोप आहेत की, पोलिस स्टेशनमधील काही “चमचे” ठेऊन हप्ते गोळा करण्याचे जाळे जोरात सुरू आहे. त्यामुळे सर्वसामान्य नागरिकांचा पोलिस प्रशासनावरचा विश्वास डळमळीत झाला आहे.
दरम्यान, स्थानिक समाजातील काही ज्येष्ठांनीही या प्रकरणाची चौकशी करण्याची मागणी वरिष्ठ पोलिस अधिकाऱ्यांकडे केली आहे. “आश्वासने देऊन लोकांना येड्यात काढणे थांबवा, आणि खऱ्या अर्थाने न्याय द्या,” अशी मागणी नागरिकांनी केली आहे.
शिरवळ परिसरात दिवाळीच्या सणासुदीत गोडवा असायला हवा होता, पण भ्रष्टाचार, गुन्हेगारी आणि प्रशासनातील बेपर्वाईमुळे अनेकांसाठी ही दिवाळी दुःखद ठरली आहे. नागरिक आता एकच अपेक्षा बाळगून आहेत — की लवकरात लवकर या प्रकारावर कारवाई होऊन शिरवळमध्ये पुन्हा कायदा आणि शांतीचे वातावरण निर्माण व्हावे.
