शिरवळ : दिवाळीचा उत्सव सर्वत्र आनंद, उजळलेली घरे आणि सणाचा जल्लोष घेऊन आला असताना शिरवळ परिसरातील गोरगरिबांची दिवाळी मात्र काळी पडल्याची चर्चा रंगली आहे. एकीकडे सर्वत्र सणाचा माहोल असताना, दुसरीकडे शिरवळ पोलिस ठाण्यातील कारभारावर गंभीर प्रश्नचिन्ह उपस्थित होत आहे. नागरिकांच्या म्हणण्यानुसार, ठाण्यातील काही अधिकाऱ्यांचा “लक्ष्मी पूजन” हा आता देवापुढे नव्हे तर अवैध व्यवसायिकांकडून होणाऱ्या वसुलीच्या माध्यमातून साजरा होत असल्याचा आरोप होत आहे.
स्थानिक सूत्रांनुसार, मटका, दारू, जुगार आणि अमली पदार्थांच्या विक्रीसारख्या अवैध धंद्यांना मागील काही दिवसांत मोठी चालना मिळाली आहे. “दिवाळी आहे, घे डबल” असे फर्मान काही अधिकाऱ्यांकडून थेट या अवैध व्यवसायिकांपर्यंत पोहोचल्याची माहिती समोर येत आहे. परिणामी, गावातील काही भागांमध्ये हे अवैध धंदे खुलेआम सुरू असून, प्रशासन मात्र डोळेझाक करत असल्याचे चित्र आहे.
गोरगरिबांच्या घरात दिवाळीचा आनंद मिणमिणता असताना, काही मोजक्या व्यक्तींच्या खिशात “काळी लक्ष्मी” ओतली जात असल्याची टीका नागरिक करत आहेत. “आम्ही तक्रार केली तर उलट तक्रारदारालाच त्रास होतो,” अशी भावना नागरिकांनी व्यक्त केली आहे. “संरक्षण देणारेच जर संरक्षण भंग करत असतील, तर न्याय कुठे मागायचा?” असा संतप्त प्रश्नही त्यांनी विचारला.
या पार्श्वभूमीवर नागरिकांकडून वरिष्ठ पोलिस अधिकाऱ्यांकडे तातडीने चौकशी व कारवाईची मागणी होत आहे. सणांचा काळ हा आनंदाचा असला तरी शिरवळ परिसरात तो अन्याय, भ्रष्टाचार आणि भीतीचा सण बनत चालल्याची खंत जनतेतून व्यक्त केली जात आहे.
लक्ष्मीच्या हव्यासाने आंधळे झालेले अधिकारी आपल्या जबाबदारीची जाणीव ठेवतील का, की “घे डबल”चा खेळच सुरू राहील? हा प्रश्न सध्या शिरवळ परिसरात चर्चेचा मुख्य विषय ठरला आहे.
