शिरवळ, दि. १३ फेब्रुवारी: शिरवळ एमआयडीसी परिसरात जुन्या वादातून एका २२ वर्षीय युवकाची निर्दयी हत्या झाल्याची धक्कादायक घटना घडली आहे. ही घटना १२ फेब्रुवारी रोजी रात्री ११:१० च्या सुमारास घडली.
मृत युवकाचे नाव अमर शांताराम कोंढाळकर (वय २२, रा. वडवाडी, ता. खंडाळा, जि. सातारा) असे आहे. या प्रकरणात तेजस महेंद्र निगडे (वय १९, रा. गुनंद, ता. भोर, जि. पुणे) याच्यावर हत्या केल्याचा संशय असून, त्याने स्वतः पोलिस ठाण्यात हजर होत गुन्ह्याची कबुली दिली.
वादाचा रक्तरंजित शेवट
प्राथमिक माहितीनुसार, काही दिवसांपूर्वी अमर आणि तेजस यांच्यात वाद झाला होता. या वादाचा राग तेजसच्या मनात कायम राहिला. याच वैमनस्यातून त्याने अमरवर प्राणघातक हल्ला केला. घटनेनंतर स्थानिक नागरिकांनी आणि पोलिसांनी अमरला तातडीने रुग्णालयात दाखल केले. मात्र, उपचार सुरू करण्यापूर्वीच डॉक्टरांनी त्याला मृत घोषित केले.
पोलिसांचा त्वरित तपास
हत्येची माहिती मिळताच शिरवळ पोलिस ठाण्याचे निरीक्षक संदीप जगताप, महिला पोलिस उपनिरीक्षक नयना कामठे, सहाय्यक पोलीस उपनिरीक्षक संजय धुमाळ, पोलिस हवालदार भाऊसाहेब दिघे, सूरज चव्हाण आणि दीपक पालेपोवाड यांनी घटनास्थळी धाव घेतली. या घटनेची गंभीर दखल घेत उपविभागीय पोलीस अधिकारी राहुल धस यांनीही घटनास्थळी भेट दिली.
आरोपीने स्वतः केली पोलिसांत हजेरी
हत्या केल्यानंतर तेजसने स्वतःहून पोलिस ठाण्यात जाऊन आत्मसमर्पण केले. पोलिसांनी त्याच्याविरुद्ध गुन्हा दाखल केला असून, पुढील तपास सुरू आहे. या घटनेमुळे शिरवळ एमआयडीसी परिसरात तणावाचे वातावरण पसरले आहे.
पहा व्हिडिओ…पहा व्हिडिओ… Instagram
