शिरवळ, २२ फेब्रुवारी: शिरवळ एसटी स्टँड परिसरात आज सायंकाळी एका फळ विक्रेत्यावर कोयत्याने हल्ला करण्यात आला. या हल्ल्यात विक्रेता गंभीर जखमी झाला असून, त्याला तातडीने रुग्णालयात दाखल करण्यात आले आहे. या घटनेमुळे परिसरात भीतीचे वातावरण पसरले आहे.
प्राथमिक माहितीनुसार, जखमी विक्रेत्याचे नाव तौफिक इब्राहिम बागवान वय २८ वर्ष असून, तो गेल्या काही वर्षांपासून एसटी स्टँड परिसरात फळ विक्रीचा व्यवसाय करत होता. सायंकाळी अंदाजे ९ वाजता तीन अनोळखी इसम त्याच्या गाडीजवळ आले आणि त्यांनी अचानक कोयत्याने हल्ला केला. विक्रेत्याने मदतीसाठी जोरात ओरडल्याने आणि नागरिकांनी धाव घेतल्याने हल्लेखोर फरार झाले.
या हल्ल्यात विक्रेत्याच्या डोक्याला आणि हाताला गंभीर जखमा झाल्या असून, नागरिकांनी तातडीने त्याला शिरवळ येथील एका खासगी रुग्णालयात दाखल केले. डॉक्टरांच्या माहितीनुसार, त्याची प्रकृती सध्या स्थिर आहे.
घटनेची माहिती मिळताच शिरवळ पोलीस स्टेशनचे पोलीस निरीक्षक संदीप जगताप, सहाय्यक पोलीस निरीक्षक महादेव सीद , पोलिस हवालदार दत्तात्रय धायगुडे , पो अंमलदार भाऊसाहेब दिघे ,अरविंद बाराळे , दीपक पालेपवाड, सूरज चव्हाण घटनास्थळी पोहोचले आणि तपास सुरू केला. हल्ल्याचे नेमके कारण अद्याप स्पष्ट झालेले नाही. पोलिसांनी परिसरातील सीसीटीव्ही फुटेज तपासणे सुरू असून, हल्लेखोरांचा शोध सुरू आहे.
या घटनेनंतर परिसरातील व्यापारी आणि नागरिकांमध्ये भीतीचे वातावरण निर्माण झाले आहे. दिवसाढवळ्या घडलेल्या या प्रकारामुळे सुरक्षेचा प्रश्न ऐरणीवर आला आहे. पोलिसांनी नागरिकांना आश्वस्त करत लवकरच आरोपींना अटक केली जाईल, असे सांगितले आहे.
